“Ek is nie Danie”, die versamelbundel, is da.
Die idee om ’n keur uit my gedigte uit te gee is gebore uit die groot reaksie op die toneelstuk “Ek is nie Danie”, wat verlede jaar by die Toyota Stellenbosch Woordfees debuteer het. Dié stuk, onder regie van
@nicoscheepers , met spel en sang deur
@albert_pret en musiek deur
@schalkjoubertmusic , het vier Woordtrofee-toekennings, insluitend beste toneelstuk, ontvang. Daar was baie navrae oor waar die gedigte beskikbaar is wat vir die verhoogstuk verwerk is.
Die gedigte vir die toneelstuk is gekies uit al vier my digbundels: In die buitenste ruimte (2006), Al is die maan ’n misverstand (2009), Solank verlange die sweep swaai (2014) en Ek en jy bestaan nie (2024). Die eerste drie bundels is egter uit druk.
Hierdie seleksie van 77 verse, met een nuwe gedig ter inleiding, kom ook uit al vier bundels. Dit sluit volledige weergawes van die 18 gedigte in wat tot die toneelstuk verwerk is, waarvan sommige vir die verhoog verkort is.
@nielvandev het met die konsep vir die stuk en die titel vorendag gekom. Aanvanklik het ek gewoon die woordspel geniet, maar mettertyd het ek besef hoe gepas “Ek is nie Danie” as titel is – ook vir ’n groter bloemlesing van gedigte. Die paradoks van onbenullig en magteloos voel op die rand van die vergetelheid, terwyl jy tog ook in vlamme staan en ondraaglik teenwoordig is, lê aan die hart van hierdie werk.
Baie dankie aan:
@schaffer.alfred wat gehelp het om die gedigte uit te soek en ’n voorwoord geskryf het;
@ingeborgpelser1978 van
@flyleaf_publishing_sa Dit was ’n onverdunde plesier om hierdie boek saam met haar aanmekaar te sit;
en aan
@kannemeyer.anton vir die kuns en omslagontwerp wat my verwagtinge ver oortref het.
Die boek sal teen 30 Maart op die rakke wees. As jy voor 25 Maart bestel op Flyleaf se webwerf kry jy korting en ’n getekende eksemplaar.
