ZLS

Spreek je Nederlands? 🗣️ Den LOD kritt eng zousätzlech Zilsprooch! Nieft dem Däitschen, dem Franséischen, dem Engleschen, dem Portugiseschen an der Gebäerdesprooch gëtt et de Lëtzebuerger Online Dictionnaire elo och op Nederlands. 🎉 Dës Versioun vum LOD – déi Der um separate Site nl.lod.lu fannt – dierft besonnesch déi 3.661 Persounen am Grand-Duché interesséieren, deenen hir Haaptsprooch laut der Vollekszielung vun 2021 Hollännesch ass. Se gouf zesumme mat zwee Benevollen, dem Här Theo van Dijk an der Madamm Marjolein de Jong, opgebaut; si hunn am Ganzen iwwer 30.000 Iwwersetzungen ausgeschafft. Mir wënschen Iech vill „plezier“ beim Entdecke vun dësem neie „woordenboek“! 😊 👉 Link an der Bio.

Trainéiert Är Orthografie – einfach, séier, richteg! Vläicht kennt Dir e schonn, eisen Orthotrainer – ma elo presentéiert e sech an engem ganz neie Look! ✨ Den Orthotrainer (orthotrainer.lu) ass eng Plattform, op där jiddereen net nëmmen d’Orthografie vun der Lëtzebuerger Sprooch mat Exercicer kann trainéieren, mee sech och déi orthografesch Reegele separat ukucken – a se souguer als PDF eroflueden. De Site gouf komplett iwwerschafft a bitt elo e Léierparcours mat iwwer 400 Exercicer, dee spilleresch un d’Orthografie eruféiert an esou motivéiert fir ze léieren. 🙌 ➡️ Fir wien ass den Orthotrainer geduecht? Déi kuerz Äntwert ass: fir jiddereen, dee seng orthografesch Kenntnisser am Lëtzebuergesche wëllt verbesseren! Besonnesch riicht e sech awer u Schüler a Schülerinne vu 4e un, d’Administratiounen an d’Léierpersonal. En ass och eng gutt Virbereedung fir all déi, déi den Zertifikat fir d’Lëtzebuerger Orthografie (ZLO) wëlle maachen. Mir wënschen Iech vill Spaass beim Entdecke vum neie Site! 🤓 👉 Link an der Bio. @kulturministere.lu @inll.lu

📚 Nei an de Regaler: De Band 7 vum „Lëtzebuerger Wuertschatz“ ass do! „Vun Inten, déi quaken, a Schof, déi lamen“: An dësem Band steet d’Déierewelt am Mëttelpunkt. 🐏 🐈 Wéi nennt een déi jonk Déieren, wéi déi männlech, wéi déi weiblech? Oder wéi seet een, wa se Klenger kréien? A wéi eng Geräischer maache se? Op all dës Froe kritt Der eng Äntwert! Am Buch ginn 248 Wierder a Spréch presentéiert, flott illustréiert, mat engem Beispillssaz ënnermoolt an op Däitsch, Franséisch, Englesch a Portugisesch iwwersat. 👉 Méi Informatioune fannt Dir op zls.lu ënner „News“. 📖 Vum 21. November u fir 12,50 € an de Librairien ze kréien.

Vergiesst net, eise Sproochesnack ze „liken“ – awer natierlech just, wann en Iech och wierklech gefält! 😇 Dës Woch hu mer e bësse méi e modernt Wuert erausgesicht. Wann een an de soziale Medie wëllt weisen, dass e Bäitrag, respektiv e Post, engem gefält, da kann een dëse liken. D’Verb kënnt aus dem Engleschen („to like“) a gëtt am Lëtzebuergeschen – an och am Däitschen – besonnesch am Kontext vun de soziale Medie gebraucht. 💡Am Lëtzebuergesche gëtt et zwou Manéieren, de Participe passé vum Verb ze schreiwen: ➡️ geliket ➡️ geliked 👉 Dir fannt d’Verb „liken“ och am LOD. Mir freeën eis op alle Fall ëmmer, wann Dir eis Sproochesnacke liket! 😊🙏

„Ech brauch eppes fir hanner d’Knäpp!“ Ma wann dat esou ass, da kënnt eise Sproochesnack jo genee richteg. 😋🍴 Dës Riedensaart bedeit nämlech näischt anescht ewéi: Ech hunn Honger! A wann Der no dëser sproochlecher Schlabäizchen awer nach sollt hongereg sinn, da kommt d’nächst Woch gären erëm fir eisen nächste Sproochesnack. 😊 👉 Dir fannt d’Riedensaart vun haut och am LOD beim Wuert „Knapp“.

„Mam Péckvillchen op d’Sprangpressessioun. Traditionell Fester“ – dat ass den Titel vun eisem Bäitrag am .kult vum @luxemburger_wort 🗞️ vun haut, an deem et ëm dräi traditionell Rendez-vousen tëschent Ouschteren a Päischte geet: d’Éimaischen, d’Oktav an d’Sprangpressessioun. Mir wënsche vill Spaass bei der Lektür! 😊

„Schluecht“ ass dat längst eesilbegt Wuert am LOD. 🤓 Wann een u Wierder mat just enger Silb denkt, da falen engem dacks kuerz Wierder an, zum Beispill: Ee, Bop, Ruff, A, o, Fra ... Eise Sproochesnack-Kandidat vun haut besteet allerdéngs och just aus enger Silb, huet awer dofir ganzer néng Buschtawen! 😲 👉 Dir fannt d’Wuert „Schluecht“ och am LOD. Wat fir en eesilbegt Wuert gefält Iech am beschten? ⤵️

Kennt Dir d’Adjektiv „giedlech“? 👀 Dee Plower huet eng giedlech Gréisst. Du kënns mer grad giedlech! Wann eppes „giedlech“ ass, da passt et gutt. Et ka sech op Gréisste bezéien, wéi am Beispill heidriwwer mam Plower, awer och op e bestëmmten Zäitpunkt – wann ee grad giedlech kënnt, da kënnt ee genee am richtege Moment. 👉 Dir fannt d’Wuert „giedlech“ och am LOD. Hutt Dir d’Wuert scho kannt? ⤵️

Wann een „Dat mécht der Kaz kee Bockel!“ 🐈 seet, da bedeit dat, dass et keen Ënnerscheed mécht – et ännert sech näischt un der Situatioun. Wann also eppes net ganz esou geet ewéi geplangt, dësen Imprevu awer kee gréisseren Impakt op d’Resultat huet, da mécht en der Kaz kee Bockel. 👉 Dir fannt den Ausdrock och am LOD bei de Wierder „Kaz“ a „Bockel“. Hutt Dir dës Expressioun schonn emol benotzt? 🤓⤵️

Eis Expo „D’Lëtzebuerger Sprooch(en)“ ass erëm ënnerwee! ✨ 📅 Vu mëttwochs, de 15. Abrëll, bis donneschdes, den 23. Abrëll, ass se an der @enad_luxembourg („École nationale pour adultes“) um Belval. Dir kënnt se an deem Zäitraum – ausser samschdes, sonndes a mëttwochs, den 22. Abrëll – tëschent 8:00 a 16:00 Auer 🕗 kucke goen. 👉 Dir braucht Iech net am Viraus unzemellen. An der Loge vun der Enad kritt Dir e Visiteursbadge, deen Der braucht, fir d’Expo kucken ze goen. Mir wënsche vill Spaass bei der Visitt! 😊 Fotoen: Tessy Troes 📸

Méisproochegkeet zu Lëtzebuerg: Mir siche Leit fir en Temoignage! 📢 Am Kader vun der Digitaliséierung vun eiser Wanderausstellung „D’Lëtzebuerger Sprooch(en)“ siche mir no Leit, déi bereet sinn, iwwer hir Erfarunge mat den Erausfuerderungen ze schwätzen, déi a méisproochege Kontexter kënnen entstoen: Hat Dir schonn emol Situatiounen, an deenen et net méiglech war, Iech an enger Sprooch auszedrécken, déi Der gutt kënnt? Zu wéi enge Schwieregkeeten ass et hei komm? Wéi krut Dir d’Situatioun geléist? 👀 👉 Méi konkreet si mer op der Sich no Persounen, déi Lëtzebuergesch schwätzen an déi virun der Kamera 🎥 iwwer hir Erfarungen an engem vun dësen zwee Beräicher wëlle schwätzen: – als Client/Cliente a spezialiséierte Geschäfter (z. B. am Baumaart), – als Patient/Patientin am Gesondheetswiesen. Wann Dir also ➡️ Lëtzebuergesch schwätzt, ➡️ kee Problem dermat hutt, virun der Kamera ze stoen, ➡️ Är konkreet Erfarung(en) mat der Méisproochegkeet als Client/Cliente oder Patient/Patientin wëllt deelen, da mellt Iech bei eis op der E-Mail-Adress [email protected]. 📧 Interesséiert Persoune gi vun eis fir e Virgespréich kontaktéiert. 📅 Den Tournage ass fir Ufank/Mëtt Mee zu Diddeleng geplangt. En Zesummeschnëtt vun den Opname gëtt um Site vun eiser digitaliséierter Wanderausstellung gewisen; dëse geet am Summer 2026 online. Merci fir Är Hëllef! 😊🙏

O vreck! Wousst Dir, dass d’Verb „vrecken“ – an also och d’Interjektioun „(o) vreck!“ – vir mat engem „v“ geschriwwe gëtt? 😯 D’Verb „vrecken“ kënnt nämlech vum däitsche Wuert „verrecken“. 👉 Méi Informatiounen iwwer d’Verb fannt Dir am LOD! Hätt Dir et richteg geschriwwen? 🤓⤵️