Ka disa njerëz në jetë që janë strehë. Për mua, ai njeri je ti!
Ti ke qenë gjithmonë forca ime e qetë. Njeriu që më ka mbajtur dorën pa pasur nevojë për shumë fjalë. Ai që më ka mbrojtur gjithë jetën, edhe kur vetë ka qenë i lodhur, i mërzitur apo i rënduar nga hallet e jetës. Ti je ai baba i rrallë që e jep dashurinë me vepra, me sakrifica, me praninë tënde që më ka bërë gjithmonë të ndihem i sigurt.
Kur isha i vogël, mendoja se ti ishe njeriu më i fortë në botë. Sot që jam rritur, e di se forca jote nuk ka qenë vetëm tek duart që punuan pa u lodhur për familjen, por tek zemra jote e madhe. Tek mënyra si ke qenë gjithmonë aty për ne. Tek mënyra si na ke dashur pa kushte.Babai im është ai burrë që kurrë nuk ka ditur t’i shprehë emocionet. Burrë i një brezi ku meshkujt i mbanin të gjitha brenda vetes: dashurinë, dhimbjen, shqetësimin. Ai është tipi i njeriut që di të thotë kur diçka nuk i pëlqen, por e ka të vështirë të tregojë sa i lumtur është.
Ti nuk ke ditur gjithmonë t’i thuash fjalët e mëdha, por unë i kam ndjerë në çdo gjë që ke bërë për mua. Në çdo herë që më ke ardhur në ndihmë pa më pyetur. Në çdo shqetësim që e mbaje brenda vetes vetëm që ne të ishim mirë. Në çdo përqafim tëndin ku ndihesha sikur asgjë e keqe nuk mund të më ndodhte.
Sot dua vetëm të të them faleminderit. Faleminderit që je ai baba që rrallë e gjen në këtë jetë. Faleminderit që më ke mësuar çfarë do të thotë dashuri e pastër, mbrojtje dhe familje. Faleminderit që edhe sot, pavarësisht viteve, kur jam pranë teje ndihem sërish ai djali i vogël që gjen gjithë botën në përqafimin e babait të tij. “Për Ty Babë” 🎶 🎶
