首先祝大家2026新年快樂🎆
新一年新開始
想藉此同大家交代一下
我正式係Kelvinshot 畢業了🎓
係呢到我首先想多謝兩個影響我事業深遠嘅男人
一個對我有啟蒙之恩，帶我入行認識婚禮呢個行業
一個對我有知遇之恩，除左教授我拍片技巧，仲有作為一個婚禮攝錄師嘅責任
-
講左我師傅Kelvin 先
@kelvinshot
時間返到去2015年5月，係我認識師傅嘅日子，當時佢影我家姐姐夫婚禮，而且又中意同一隊甲一球隊，所以開始多左傾計💬果晚係我第一次真正去睇早拍晚播，當時個反應係嘩！之後就眼前一亮，然後對拍片有興趣嘅種子就開始埋下了。。。
-
2017年7月，當時讀緊year 2嘅我，見到師傅Kelvin 公開話請人，我就膽粗粗DM佢，之後就上左公司參加個workshop，然後就。。。做到依家啦🤣
-
師傅係淡季或者就算旺季幾忙都好，都會定期group埋大家返公司坐埋一齊開分享會，將佢係婚禮行業嘅經驗，待人處事，一一分享俾我哋
-
師傅係一個我好佩服嘅人，同佢一齊開工，除左覺得佢型之外，仲壓到場，拍片又好唯美，最重要係我睇佢嘅片都會覺得好感動，然後聽到台下觀眾嘅掌聲同新人嘅稱讚，我就係到幻想會唔會有一日我都可以咁呢🙈果一刻，我就知道自己冇入錯行。
-
去到2019年1月，小弟接到第一單早拍晚播(當時我緊張到仆街，前一個星期都訓得唔好)，然後師傅同一班師姐師兄們都俾左無限信心我，教我點樣做，之後我就咁成功完成左，好有滿足感。事後知道師傅oversea wedding 緊，專登搵人開live睇我條片，我真係好感動。。。亦好多謝佢對我嘅信任。
-
除左師傅之外，我最多就係同二師兄Gordon開工，好多謝你俾左好多創作嘅空間我去不停試，又俾無限情緒價值我，令到我係歡樂中成長。到你自己結婚竟然搵左我影，你知唔知，其實我壓力山大，因為你其實有好多選擇，然後你最後揀左我。。。🥹
@kelvinshot_gordon
-
想係到同埋三師兄嵐少講少少🤏雖然同你一齊開工次數並唔係好多，但我記得你同我分享你對婚禮嘅睇法，有啲野點解會咁影，點解會咁做，我全部都記得架！可能我哋同樣都係雙子座，所以好多時候我都會有共鳴，我好多年前已經講過如果我結婚會搵你做攝錄師，呢句野唔係9up，係認真的。
@nam_infilming
-
係Kelvinshot呢個家庭嘅日子，好多謝各位師兄師姐師弟師妹嘅照顧，我唔一一再係到多謝了，因為我會隨時返黎同大家食飯的🤣 當中我亦有做得唔好嘅地方，多謝大家肯包容我。
-
仲有好多行家前輩都想多謝，係香港，唔係香港的，我都記得同你哋開工嘅日子，多謝你哋睇住我大。
-
師傅，記得你係我哋入公司第一日就問大家搵唔搵到屬於自己嘅果度門，我諗，依家我搵到了。
最後想係到講多一句，無論以後發生咩事，我會永遠記得Kelvin係我師傅💛
-
然後要講帶我入行嘅大佬Kidd
@kmmanphotography
由初初跟你做助手，我真係對婚禮呢個行業零知識，記得開頭都有好多蝦碌野🙈見證住你一直增值自己同進步，然後公司發展得越黎越好，我都好替你開心，在公在私你都分享左好多野俾我知，好多謝你，因為之後仲會成日同你一齊工作，所以我唔講太多住🤣
我講過
有一日我要做到一個攝錄師同你並肩作戰，我有做到架！以後嘅日子仲要多多指教🐒
-
最後
我想介紹返我公司
@orizuru.memory
之後想搵我拍片可以直接搵我🙋🏼
好開心係婚禮行業都識到一班志同道合嘅好兄弟同好朋友
仲有一直好欣賞我嘅客人們
希望大家新一年都越黎越好，同身體健康🫶🏽未來見
Pic 1 Kelvinshot拎10周年榮譽大獎慶功宴
Pic 2 係2017年10月第1次跟師傅開工
Pic 3 係2017年12月第1次同呢2個男人開工
Pic 4 海外直播早拍晚播
Pic 5 Kelvinshot搬走駱駝漆最後一日
Pic 6 嵐少結婚
Pic 7 係2015第1日做助手嘅相
Pic 8-10 慶功宴
Pic 11 credit by Kidd
