從事婚禮攝影12年，不知不覺就將自己人生好寶貴嘅青年到中年時期，獻咗俾呢個事業。 或者我從來都係一個怪人，做婚禮攝影師做到自帶使命感，覺得自己有責任去令人地幸福快樂。曾經幫過好多對新人、幫過好多過家庭，手執一部相機，一日之間可以令一個破碎家庭破鏡重圓，可以令一個又一個家庭唔再帶有遺憾，我覺得呢個係婚禮攝影師應該做嘅事，影靚相只係基本。
婚禮攝影帶咗好多好多俾我，亦令我失去咗好多好多，尤其係與身邊親人朋友之間嘅相處時光，係一去不復回。人大咗，當然明白一切都係取捨，我唔會埋怨，只會怪原來一直已經好努力嘅自己，原來仲可以做得更加好。如果冇呢十二年嘅人生經歷，我又會唔會有今日嘅自己？
近來成日反問自己，點樣可以進步、點樣可以突破、點樣可以做得更加好、點樣可以帶領團隊去突破重圍，俾咗自己好大好大壓力。冇諗過，幾日前一單婚禮拍攝，客戶一家都對我讚不絕口，令我諗翻起當初嘅我，係點樣一路走來，一步一腳印。
今日突然好想念喺布拉格嘅日子，我諗呢度應該係除咗香港之外，係我全世界影得最多相、影得最多客、留得最耐嘅一個地方，比日本任何一個城市更甚。喺舊城區裡面嘅每一條大街小巷我都行過，好鍾意呢個舊城鎮俾我嘅感覺，嗰種節奏、嗰種文化氣息。
I miss Prague
#LoftWedding
#WeAreLOFT
