رمضان الحقيقي.. هو جبل الماعون!
بعيدًا عن السربيس المذهّب و الطواول المنصوبة من هوني لغادي بما لذ و طاب و شطور العظم فوق السلاطة مشويّة و امّك حوريّة.. و كاس للبن و كاس لليموناظا و كاس للبسيسة و كاس الماء بخلاف فناجن القهاوي مع قعيدة بالقفطان على فون لطفي بوشناق و يا للّا وينك توحشتو زينك🙄
الصحافي شكون بيهم؟ صحفة للشربة و صحفة لعصيدة البوفريوة و صحفة للبوزة.. بربي سؤال عالطاير : البوزة تشربوها باردة و لا سخونة؟
العظم المروّب كي يلصق في الصحن و يشيح فوقو، كيفاش يتقرقش بش يتنحّى؟
تحب نحكيلكم عالنواصر؟ مبلدها و مركها! تكبّش في الصحن و في المغارف و الفراڤط و السكاكن و في المقفول و في الكسكاس و في البيراكس و كل مربّع لازمك تعملو قيمة و قدر و تطلب منو بكلّ اللطف الإذن بش تقلّع جد بوه من فوق الماعون..
حاصيلو رمضانكم مبروك و ربي يعدي هالليامات على خير و حمد لله فما نجاة عتابو مونستني
