Ég rakst á M við sjálfboðastörf í Ráðhúsinu á kjördag. Hún tók á móti mér í anddyrinu og vísaði mér á kjördeild fimm. Viðeigandi, þar sem við hjálpuðumst að við að siða gormana í fimmta bekk síðasta vor, hún við töfluna og ég á reiki milli borða. Ef sérhyggjan brýtur félagsandann á bak aftur í nótt get ég sefað hugann í þeirri vitund að enn er til fólk sem leggur allt í sölurnar til að hlúa að samfélögum í stað þess að keppast við að sundra þeim. Án þeirra væri heimurinn kaldur.
mjóddin er kirkja
róninn prestur
löggurnar altarissúlur
hann predikar
undir björtum geislum sólarinnar
skammyrðin bergmála um salinn
verða heilög
súpa í brauði
brauð í súpu
svona geta dagarnir verið mismunandi
Sofnað í stól á aðfangadegi Þorláksmessu
Ég sofnaði í stólnum á aðfangadegi Þorláksmessu. Þegar ég vaknaði höfðu allir staðirnir lokað svo ég hentist út í Bónus og greip í snatri örbylgjuplokkfisk með béarnaisesósu ásamt Floridana Vellíðan með góðgerlum. Ég bjóst til að úthúða gæðum réttarins en þurfti að stilla mig því plokkfiskurinn reyndist sá besti sem ég hef smakkað. Mun kaupa hann aftur í bráð. Að öllu leyti góðar fréttir fyrir utan þá að vera orðinn týpan sem sofnar í stólnum og borðar Bónusörbylgjuplokkfisk á aðfangadegi Þorláksmessu. Einhvern veginn verða hefðirnar til.
