紅色白碎花裙
出黎行，大家都知，新識一個男仔嘅話，第一次同佢出街並唔可以太靚，好野要留番後面黎，江湖傳聞第三次就要黎一次重擊，兒女私情，背後全是計算。
我有一條主色紅色，上面有白色碎花嘅裙，佢有個唔係好低嘅V字領設計，長度唔算短但都喺膝頭哥上幾吋，又有綁帶修腰。簡單黎講，係一條露到我最引以為傲嘅部位（胸同腳），但又唔算暴露嘅裙，紅色同我係最friend嘅，著左佢又有啲女人味又有啲調皮咁啦，總之一著就會覺得活力四射，行路有風，魅力+999，老豆係香港第1有錢，靚女*9999999。
呢條裙有個秘密，佢係我嘅王牌，我唔知係著左佢會令我自信爆燈，定呢條裙真係靚，總之，如果我著左呢條裙，基本上，引用少林足球嘅台詞：「可以話係毫無破綻」，百戰百勝。
有一次，第一次正式出街，我就出動左我張王牌，我諗佢係完全唔知我幾有心機。
嗰日好開心，好幸福。
• • • • • • • • • •
然後條友好快變咗世界第一壞人。
我好想好想丟左條裙佢，但條裙我真係好鍾意。
And then the dress sat in my closet for 2 years.
• • • • • • • • • •
到最近，可能因為時間
可能因為做咗Hedwig and the Angry Inch
我終於可以面對到呢條裙
雖然唔再喺嗰種場合出動
I was just very happy to be in the dress again
滿心歡喜著出黎嗰日，個朋友話我好似一塊肥牛
正確黎講日本九州黑毛和牛肩胛肉
我真係覺得生命係嘲笑緊我
我係咪應該丟咗條裙佢...？
最近有一位前輩問我，喺美國嘅時候睇到嘅戲，多數係咩類型或者係咩主題多，嗰一刻我諗唔到一個最好嘅字，我應該係類似答：做自己，但唔係以前嗰種做自己。以前嘅嗰一種，係類似「我要你做大家閨秀！」但係你拒絕，拒絕被stereotype，而家係一種「我就係自己，我自己開一個category」，什麼都可以，鼓勵人人有愛，人人有人愛。
過兩日，喺睇超粒方嘅時候聽到一個term：「後現代」，即是拒絕單一正確答案。舉一個例，我睇嘅其中一套音樂劇叫&Juliet，羅密歐與茱麗葉個Juliet，個戲一開始就係講莎士比亞老婆要改故事，拒絕茱麗葉為咗羅密歐而死，一個拒絕被Stereotype嘅主題，跟住個戲一路發展落去，茱麗葉喺尋找自己嘅過程，又搵自己嘅愛情，揀自己嘅老公，羅密歐有黎追茱麗葉，茱麗葉冇應承，然後發現自己唔洗需要另一半，自己有選擇做所有嘅、任何嘅決定，佢唔洗聽人地講要點要點，自己可以發聲，有自信，好喇，當我以為個戲會完喺呢度嘅時候，佢決定同羅密歐黎一次純純正正嘅first date，但係佢今次已經成長咗，心態唔同左。
我又舉另一個例子，音樂劇Some Like It Hot，男主角之一Jerry著女裝變成Daphne，佢無故意要扮女人，亦都唔係drag，當有個有錢寡佬追佢嘅時候，故事無講到底佢地係gay定係咩，而係總之佢地相愛覺得對方完美perfect for each other。
對我黎講，呢種劇情已經係再跨越左「拒絕stereotype」呢樣野，而係再去到下一步。當香港都未開始可以講LGBT時，人家已經講緊LGBT+。一個鼓勵大家從自己角度出發嘅國家，對其他人嘅包容度同接受度，好似仲高過以社會/家庭/團體為核心嘅城市（香港）。
希望好快喺香港可以見到更多有特色嘅創作，尤其我希望見到有更多似英國Fleabag呢類女人寫女人嘅戲劇。
題外話，香港戲院播緊Fleabag嘅NT live，如果係電視劇嘅fans唔好錯過。
#戲劇 #後現代 #動刀動槍動金筆 #動刀動槍動金筆紐約篇 #drama #postmodern
